Кантэкст: Аляксандр Лукашэнка падчас паездкі ў Берасцейскую вобласць 30 ліпеня назваў сельскую гаспадарку і прамысловасць дзвюма любімымі галінамі эканомікі. Прамысловасць ён звязаў з існаваннем краіны: «Будзе жыць прамысловасць — будзе жыць краіна». У сельскай гаспадарцы Лукашэнка асобна казаў пра захаванне вёскі, паколькі, паводле яго слоў, «без вёскі няма краіны».
У ток-шоу «Будні» на «Альфа Радыё» і СБТБ 21 ліпеня 2026 года палітолаг Аляксей Бяляеў пералічваў доказы таго, што Беларусь нібыта выбрала правільны шлях эканамічнага развіцця. Адзін з ягоных аргументаў — рост беларускай эканомікі на фоне падзення ў Еўразвязе.
«На 1,5% вырасла эканоміка. А я скажу, што, напрыклад, паводле дадзеных Еўрастату, у Еўразвязе эканоміка цяпер падае. І ў цэлым падзенне недзе на ўзроўні каля двух, па-мойму, адсоткаў у цэлым па Еўразвязе. <...> А ў некаторых краінах, дарэчы, Еўразвязу па асобных дзяржавах, там ёсць тры лідары, у тым ліку блізкая да нас Латвія. У яе падзенне эканамічнага росту на 3%, а ёсць краіны, дзе 9% падзенне. Дзевяць. І ў цэлым па Еўропе мінус. <…> Беларусь выбрала правільную стратэгію», — сказаў Бяляеў.
Беларуская эканоміка сапраўды вырасла за першыя шэсць месяцаў года на 1,5%, хоць у першым квартале яшчэ была ў мінусе. Але словы пра падзенне эканомікі Еўразвязу няслушныя: і ў першым, і ў другім кварталах там быў рост ВУП.
З 27 краін ЕЗ падзенне зафіксавалі толькі ў дзвюх — Ірландыі і Румыніі. У еўрапейскіх суседзяў Беларусі сітуацыя таксама не падобная да карціны, якую апісаў Бяляеў. У Латвіі, насуперак ягоным словам, было не падзенне, а рост на 2,5%, хоць гэта дадзеныя толькі за першыя тры месяцы. У Польшчы эканоміка вырасла на 3,5%. Па Літве ёсць больш свежая статыстыка: у другім квартале краіна апынулася сярод лідараў Еўразвязу па росце эканомікі — плюс 3,8%.
То бок ва ўсіх трох еўрапейскіх суседзяў Беларусі эканоміка расла, прычым даволі актыўна.
Асобна Бяляеў гаварыў пра прамысловасць.
«Мы бачым у краінах Еўропы спад прамысловай вытворчасці. Спад, яны перастаюць выпускаць прадукцыю. Беларусь нарошчвае сваю прамысловую вытворчасць, вытворчасць сельскагаспадарчай прадукцыі», — заявіў ён.
У Еўразвязе сапраўды быў спад прамысловай вытворчасці: з пяці месяцаў гэтага года толькі адзін апынуўся ў плюсе, у астатнія прамысловасць адставала ад узроўню мінулага года. Але гэты спад не закрануў найбліжэйшых еўрапейскіх суседзяў Беларусі. Апошнія дадзеныя па Латвіі, Літве і Польшчы паказваюць рост прамысловай вытворчасці — ад амаль 4% да 8%.
Крыніца: БРЦ
У Беларусі прамысловасць, наадварот, пакуль заставалася ў мінусе, хоць паступова з яго выходзіла. У першым квартале зніжэнне год да году перавышала 3%, а па выніках паўгоддзя падзенне скарацілася да менш чым 1%.
