Пра планы Расеі ў дачыненні да Сувалкскага калідора ваенны эксперт Аляксандр Артамонаў згадаў 14 лістапада 2024 года ў эфіры тэлеканалу News.by, калі крытыкаваў NATO за нарошчванне колькасці войскаў у тым рэгіёне.
«Чамусьці гаворыцца, чаму, я не ведаю, што нібыта Расея будзе прабіваць да Беларусі Сувалкскі калідор. Паўтараю, шлях нацыстаў. Расея ніколі ў жыцці не заяўляла, што ёй гэты калідор неяк неабходны, што яна наогул збіраецца займацца такімі супрацьпраўнымі рэчамі», — запэўніў Артамонаў.
Сувалкскі калідор — гэта тэрыторыя, якая належыць Польшчы, з аднаго боку яна звязвае краіны Балтыі з астатняй часткай ЕЗ, з другога — гэта самы кароткі шлях з Беларусі ў Калінінградскую вобласць. Таму гэты ўчастак важны для Расеі.
Каманда WTF знайшла пацверджанні, што пагрозы захапіць гэты калідор ад Расеі гучалі. Напрыклад, Дзмітрый Рагозін, былы кіраўнік «Раскосмасу», а цяпер сенатар захопленай Запарожскай вобласці, у студзені 2024 года заявіў у сваім тэлеграм-канале, што «прыйшоў час прасекчы калідор у Калінінградскую вобласць». Такі пост з'явіўся ў адказ на навіну пра закрыццё рускіх школ у Літве.
Кіраўнік Камітэту Дзярждумы ў абароне Андрэй Картаполаў у ліпені 2023 года, пасля чэрвеньскага бунту ПВК «Вагнер» і пастановы кіраўніка наймітаў Яўгена Прыгожына адвесці іх у Беларусь, сказаў:
«Зразумела, што "вагнера" сышлі ў Беларусь, каб навучаць беларускія ўзброеныя сілы. На самай справе ж не толькі. Не толькі і не столькі. Ёсць такі Сувалкскі калідор. Усе добра ведаюць. І вось гэты Сувалкскі калідор у выпадку чаго нам вельмі патрэбны. <...> Гатовы ўдарны кулак, які вось гэты няшчасны калідор возьме за лічаныя гадзіны. І тут зноў мы іх апярэдзілі».
