Кантэкст: Расейцы ў сярэднім трацяць на авіятуры ў Беларусь каля $1000. Гаворка ідзе пра паездкі на тры-чатыры дні на травеньскія святы для двух-трох чалавек. Такія дадзеныя прадставіла аналітычная служба Асацыяцыі тураператараў Расеі. У арганізацыі таксама адзначылі, што ў 2026 годзе адпачынак у Беларусі для расейцаў падаражэў на 10–15%, а са студзеня дзецям для ўезду ў Беларусь патрэбны замежны пашпарт. Пры гэтым гэтыя фактары наўрад ці істотна паўплываюць на турыстычны паток: Беларусь і раней не была папулярным напрамкам для сямейнага адпачынку з дзецьмі, яе часцей выбіралі дарослыя турысты для экскурсіяў або санаторнага адпачынку.
У праграме «Контуры» на АНТ 3 траўня 2026 года ў сюжэце пра пачатак турыстычнага сезону Ангеліна Дзікун распавяла, што Беларусь стала для расейцаў галоўным напрамкам на травеньскія святы:
«Вясновыя святы — гэта не проста высокі сезон, гэта сапраўдны турыстычны бум. Статыстыка пацвярджае: на гэтыя травеньскія Беларусь для расейцаў — напрамак нумар адзін, які на роўных канкуруе з курортамі Турцыі».
Дадзеныя трох расейскіх букінгавых платформаў паказалі, што Беларусь лідаравала толькі на адной з іх — «Отелло». Там яна сапраўды абагнала Турцыю сярод замежных напрамкаў. На сэрвісе браніравання жылля «Островок» Беларусь заняла другое месца пасля Турцыі. Паводле дадзеных OneTwoTrip, беларускі напрамак у параўнанні з мінулым годам пагоршыў свае пазіцыі і апынуўся трэцім: яго абагналі Турцыя і Кітай. То бок паводле самастойнага браніравання Беларусь уваходзіць у тройку папулярных напрамкаў для вясновага адпачынку расейцаў.
У арганізаваным турызме пазіцыі Беларусі яшчэ ніжэйшыя. Паводле дадзеных Асацыяцыі тураператараў Расеі, гэтай вясной расейцы з-за ваенных канфліктаў у свеце пераключаліся з Кубы і ААЭ на іншыя турыстычныя напрамкі. Гэта ўпершыню вывела Беларусь у топ-10 травеньскіх тураў.
Каманда Weekly Top Fake знайшла паказнік, паводле якога Беларусь сапраўды апынулася на першым месцы і наблізілася да курортнай Турцыі, — кошт пражывання. Паводле дадзеных сэрвісу браніравання «Островок», расейцы плацяць за ноч у Беларусі ў сярэднім $170.
Такім чынам, супрацоўніца АНТ Ангеліна Дзікун перабольшыла пазіцыі Беларусі на расейскім турыстычным рынку. Краіна папулярная ў расейцаў і ўвайшла ў лік запатрабаваных напрамкаў на травеньскія святы, але дадзеныя розных сэрвісаў не пацвярджаюць, што яна стала напрамкам нумар адзін.
