Эканаміст з Малдовы Сяргей Банар у інтэрв'ю інфармацыйнаму агенцтву БелТА 7 лютага заявіў, што працягласць жыцця ў Беларусі такая ж, як у самых развітых краінах.
«Сярэдні ўзрост жыцця ў Беларусі адпавядае ўзроўню жыцця самых развітых краін. У вас для мужчын сярэдняя працягласць жыцця 69 гадоў, для жанчын — 79, агульная па палаце — 74,5 года. Гэта сапраўды вельмі высокі ўзровень жыцця. У прыбалтыйскіх дзяржавах толькі Літва, па-мойму, вышэйшая, чым у Беларусі. Усе астатнія ніжэй. Але пра гэта ніхто не кажа», — сказаў ён.
Па дадзеных Сусветнай арганізацыі аховы здароўя, працягласць жыцця ў развітых краінах складае 82-83 гады. У Літве — 76 гадоў, у Латвіі — крыху больш за 75, у Эстоніі — амаль 79. Беларусь саступае па гэтым паказніку ўсім краінам ЕЗ.
Раней тэлеканал АНТ параўнаў працягласць жыцця ў Беларусі з краінамі СНД.
«Дарэчы, на прасторы СНД беларусы жывуць даўжэй за ўсіх — у сярэднім 75 гадоў. Для параўнання, у сярэдзіне 90-х сярэдняя працягласць жыцця ў нашай краіне была каля 67 гадоў», — распавялі ў навінавым сюжэце 4 лютага.
Даўжэй за ўсіх на прасторы СНД жывуць армяне — у сярэднім 76 гадоў.
