Пра высокія сацыяльна-эканамічныя паказнікі, якіх Беларусь дасягнула за апошнюю пяцігодку з Аляксандрам Лукашэнкам у прэзідэнцкім крэсле, вядоўца праграмы «Нашы навіны» Алена Міхалоўская распавяла 25 сакавіка 2025 года:
«З 21-га сярэдняя зарплата вырасла амаль удвая, у бюджэтных арганізацыях — у 1,7 разу. Не адстае і мінімальны заробак, зніжаецца ўзровень беспрацоўя. Прыярытэт — і клопат пра старэйшае пакаленне. Істотна павялічыліся пенсіі: калі пад канец 20-га ў сярэднім непрацоўны пенсіянер атрымаў 511 рублёў, то ўжо ў лютым гэтага года — 932. За чатыры гады амаль удвая павялічылася і дапамога сем'ям з дзецьмі да трох гадоў, расце ў краіне і колькасць шматдзетных — іх ужо 123 тысячы. Гэта звязваюць з падтрымкай дзяржавы. Напрыклад, сямейны капітал у 25-м — гэта больш за 33 тысячы рублёў, у паўтара разу больш, чым пяць гадоў таму».
Пад канец 2020 года сярэдні заробак у Беларусі, паводле дадзеных Белстату, складаў амаль 1,5 тыс. рублёў. Пад канец 2024-га — каля 2,7 тыс. рублёў. То бок намінальна налічаная сума вырасла ў 1,8 раза. Аднак павелічэнне сярэдніх сум выплат не азначае, што людзі сталі багацейшыя. Гэтыя паказнікі не ўлічваюць фактараў, якія ў рэчаіснасці ўплываюць на матэрыяльны дабрабыт насельніцтва: напрыклад, інфляцыю, курс нацыянальнай валюты, розніцу ў росце прыбыткаў і выдаткаў і г.д.
За апошнія пяць гадоў тавары і паслугі ў Беларусі, па падліках каманды WTF з улікам афіцыйных дадзеных, падаражэлі амаль на 34%. Калі ацаніць рост прыбыткаў насельніцтва з улікам павышэння цэн, то атрымаецца, што за час апошняй кадэнцыі Аляксандра Лукашэнкі сярэдні заробак вырас не ўдвая, а на траціну. На траціну падрасла і дапамога на дзяцей. Пенсіі — на 20%, а мінімальны заробак стаў больш на 16%.
Калі перавесці зарплаты, пенсіі і іншае ў долары, то атрымаецца, што прыбыткі за пяць гадоў выраслі на 12–28%. Сямейны капітал — на 4%.
