Тэму «ісламізацыі» Еўропы паднялі 11 студзеня 2026 года ў ток-шоу «Думкі» на канале СТБ. Вядоўца Ігар Пазняк заявіў, што ў ЕЗ робяцца традыцыяй навагоднія і калядныя пагромы. Потым у эфіры паказалі фрагменты відэа з масавымі беспарадкамі, якія ладзілі мігранты з Блізкага Усходу, Сірыі і іншых краін. Закадравы голас распавёў:
«Новы год у Еўропе запомніўся і радыкальным скасаваннем традыцыйных хрысціянскіх знакаў. Так па ўсім Еўразвязе і Вялікай Брытаніі ў перадсвяточныя дні радыкальныя ісламісты палілі калядныя елкі. <…> Падпалі пад напад цэрквы і касцёлы. Ціхі жах і пачуццё страты ўсіх еўрапейцаў выказала жыхарка Амстэрдама, назіраючы, як гарыць гістарычная царква: “Мяне гэта вельмі моцна закранула. Царква была часткай жыцця нашага раёну”».
Храм, пра які распавяла нідэрландка, — гэта нядзейная каталіцкая царква XIX стагоддзя Вондэлкерк. Яна загарэлася ў навагоднюю ноч. Афіцыйнага пацверджання, што яе падпалілі мігранты, няма; меркавана, усяму віной феерверкі. Паліцыя праводзіць расследаванне.
Выпадак падпалу каляднай елкі ў святы сапраўды быў — у горадзе Джэнін на Заходнім беразе ракі Іярдан. Загарэлася елка і ў Варшаве, але ад феерверкаў, а не праз падпал.
Відэа запаленай елкі, якое паказалі на СТБ, знялі не ў Вялікай Брытаніі, а ў Кітаі. На ім бачны надпісы на кітайскай мове. Прычынай узгарання кітайскай елкі была няспраўная праводка, а не падпал.
Пад канец 2025-га пра пагромы і падпалы елак распавялі і на тэлеканале АНТ:
«У Еўропе працягваюць падпальваць навагоднія елкі, спрабуючы скасаваць традыцыйныя святы. Галоўным чынам гэта справа рук усё тых жа мігрантаў, якія навязваюць свае ўстоі. Знішчаюць калядныя знакі на вачах ва ўсіх, і паліцыя быццам нічога не бачыць».
Гэтыя словы падмацавалі двума відэа. На першым — Аргенціна. Там праходзіла акцыя пратэсту з патрабаваннем падвышэння заработнай платы. Елку, якая стаяла ля будынку мэрыі, пратэстоўцы падпалілі на знак пратэсту супраць палітыкі мясцовага мэра, а не традыцыйных устояў.
А другое відэа — з Егіпта. На кадрах бачны надпіс на арабскім «Каляды ў Егіпце адрозніваюцца ад звычайных» і паказана назва інстаграм-акаўнта, дзе ролік з'явіўся больш за год таму.
Такім чынам, паказаныя тэлеканаламі ролікі не пацвярджаюць тэзы пра тое, што ў ЕЗ і Вялікай Брытаніі мігранты масава палілі калядныя елкі і нападалі на храмы.
