«Мы ж, калі кажам пра мігрантаў, няма жорсткага падзелу, ведаеце, вось, як у Еўразвязе, што, калі яны прыцягваюць уцекачоў, мігрантаў і, фактычна, прымушаюць іх працаваць на нізкакваліфікаваных працоўных месцах. Мы ж, наадварот, зацікаўлены ў тым, каб па максімуме залучаць да сябе і спецыялістаў, інжынераў, канструктараў. … І мы — краіна, якая мае магутную навуковую, тэхналагічную базу, вытворчую базу, — зацікаўлены ў прыцягненні навуковых мігрантаў, так, высокакваліфікаваных мігрантаў. Для гэтага ёсць усе магчымасці, каб працаваць», — заявіў Аўдонін.
У афіцыйным спісе прафесіяў, па якіх Беларусь гатова працаўладкоўваць замежнікаў у спрошчаным парадку (без звычайных абмежаванняў для абароны мясцовага рынку працы), значацца каля 40 рабочых спецыяльнасцяў і 18 — для кваліфікаваных спецыялістаў. Да першых адносяцца швачкі, трактарысты, даяркі, санітаркі, токары — вышэйшай адукацыі не патрабуецца. Да другіх — медыкі, інжынеры, аграномы і іншыя дыпламаваныя працаўнікі.
Паводле справаздач МУС за 2024 год, па спецыяльнасцях з гэтага пераліку працавалі 19 тыс. замежнікаў. 98% з іх менавіта на рабочых прафесіях. Больш за ўсё прыезджых працавалі кіроўцамі, кухарамі і тынкоўшчыкамі. На пасадах для кваліфікаваных спецыялістаў працавалі 450 замежнікаў — каля 2%.
Атрымліваецца, Беларусь дэкларуе імкненне прыцягваць адукаваных і высокакваліфікаваных мігрантаў, але на практыцы большасць занятыя меней кваліфікаванай працай.
Для параўнання: каля траціны мігрантаў, што жывуць у Еўразвязе, паводле дадзеных Еўрастату, маюць вышэйшую адукацыю. Асабліва запатрабаваны медыкі. Напрыклад, у Нарвегіі, Ірландыі і Швейцарыі доля лекараў з замежнай медадукацыяй дасягае 40%, у Вялікай Брытаніі і Швецыі — кожны трэці.
У ЕЗ дзейнічае Blue Card — дазвол на жыхарства адмыслова для прыцягнення кваліфікаванай працоўнай сілы. У апошнія гады колькасць выдадзеных Blue Card расце. Найчасцей іх атрымліваюць грамадзяне Індыі, Расеі, Турцыі і Беларусі. У 2023 годзе з 90 тыс. выдадзеных Blue Card 5 тыс. атрымалі беларусы. Працаваць па гэтых картах едуць пераважна ў Нямеччыну, Францыю і Польшчу.
