У Кітаі з 31 жніўня па 1 верасня 2025 года прайшоў 25-ы саміт Шанхайскай арганізацыі супрацы (ШАС). Асвятляючы гэту падзею ў апошні дзень лета, у эфіры АНТ паказалі рэпартаж палітычнага аглядальніка Ігара Тура. У ім расказалі, што «адметнае стаўленне Сі Цзіньпіна да беларускага лідара выяўляецца ва ўсім: … цырыманіяле па прылёце, асаблівым шыку картэжу, што на мове дыпламатыі вельмі важна».
«Але галоўнае — лідар магутнага Кітая, які ў гэтыя дні прымае цэлы россып кіраўнікоў краін ШАС, першай сваёй двухбаковай сустрэчай, на першае месца прыярытэтаў ставіць Беларусь», — сказана ў сюжэце.
Двухбаковая сустрэча Аляксандра Лукашэнкі і Сі Цзіньпіна сапраўды адбылася. Аднак на сайце Міністэрства замежных спраў КНР, дзе публікуецца інфармацыя пра сустрэчы з кіраўнікамі замежных дзяржаў, паказана, што першая была з генеральным сакратаром ААН. У той жа дзень — 30 жніўня — кіраўнік Кітая паспеў сустрэцца з лідарамі Егіпта, Камбоджы, М'янмы, Непала і Казахстану. Прадстаўнік Беларусі з'явіўся ў графіку гаспадара саміту толькі на наступны дзень, пасля перамоў з прэм'ер-міністрам Арменіі.
Пра адметнае стаўленне Сі Цзіньпіна да Аляксандра Лукашэнкі распавялі і ў эфіры СТБ. У рэпартажы з месца падзей карэспандэнт Яўген Пуставы перадаў:
«Чырвоная дывановая дарожка і ганаровая варта для Пуціна, Модзі, Гутэрыш. Аляксандра Лукашэнку віталі яшчэ і некалькі аўтобусаў дзяўчат у нацыянальных касцюмах».
Каманда WTF знайшла відэа з сустрэчы прадстаўнікоў іншых краін, што ўдзельнічалі ў саміце. Прэм'ер-міністра Індыі ў Кітаі апроч ганаровай варты таксама віталі артысткі, якія танцуюць у нацыянальных касцюмах. Аналагічная сітуацыя была пры сустрэчы прэзідэнта Турцыі і выконваючага абавязкі прэзідэнта М'янмы. Артысткі танчылі таксама пры сустрэчы лідараў Егіпта, Пакістана, Непала, Арменіі, Таджыкістану, Узбекістана, Азербайджану і Кыргызстану. Гэта не было выключным жэстам у бок Лукашэнкі.
Дзяўчаты ў нацыянальных касцюмах не танцавалі ў двух выпадках: калі прыляцеў прэзідэнт РФ Уладзімір Пуцін (яго вітала толькі ганаровая варта) і для генеральнага сакратара ААН Антонью Гутэрыша.
