Пра дасягненні краін з камуністычнай сістэмай адукацыі Кірыл Казакоў распавёў 5 сакавіка 2025 года ў эфіры «Радыё Менск». Гэтую тэму ён абмеркаваў з сувядоўцай Алёнай Радоўскай і гасцямі — амерыканскім музыкам Артурам Гарфанкелам, сынам удзельніка культавага дуэта Simon & Garfunkel, і магістрам БДУКМ Вань Цзыі.
«Давай проста возьмем спісы пераможцаў апошніх матэматычных і шахматных алімпіяд — гэта кітайцы, рускія, беларусы і ўсё. І ўсё. А гэта што значыць? Гэта тая самая камуністычная сістэма адукацыі, якой яна б ні была, яна сапраўды з'яўляецца лепшай», — распавёў Казакоў.
Паводле дадзеных Міжнароднай шахматнай федэрацыі FIDE, у сакавіку 2025 года рэйтынг краін з самымі моцнымі шахматыстамі ўзначальвалі ЗША, Індыя і Кітай. Расея — на чацвёртай пазіцыі, а Беларусь — на 54-й.
Калі разглядаць індывідуальныя дасягненні шахматыстаў, то найлепшы ў свеце ў сакавіцкім рэйтынгу — нарвежац Магнус Карлсэн. У дзясятцы наймацнейшых больш за ўсё выхадцаў з Індыі. Наймацнейшы кітайскі гулец займае сёмы радок, лепшы расеец — Ян Няпомняшчы — дзясятую. Беларусы не патрапілі нават у топ-100. Больш высокі вынік паказаў беларускі Юніёр Дзяніс Лазавік — 17 месца.
Аднак варта ўлічыць, што з увядзеннем санкцый супраць Расеі і Беларусі спартоўцы ў розных дысцыплінах не могуць выступаць пад сцягамі сваіх краін. Гэта паўплывала на іх пазіцыі ў выніковым рэйтынгу. Да пачатку поўнамаштабнай вайны ва Украіне расейскія шахматысты ўтрымлівалі лідарства ў рэйтынгу Федэрацыі. За імі ішлі ЗША, трэці радок займаў Кітай. Беларусь таксама была крыху бліжэй да п'едэстала — на 41 месцы.
На міжнароднай матэматычнай алімпіядзе 2024 года беларусы занялі 5 месца — гэта лепшы вынік у Еўропе і найвышэйшы за ўсю гісторыю ўдзелу нашай краіны. Беларусь саступіла ЗША, Кітаю, Карэі і Індыі. Расейскіх школьнікаў да камандных спаборніцтваў не дапусцілі. Хоць да ўвядзення санкцый — у 2020 і 2021 гадах — яны занялі другое месца. А ў 2022 годзе 17-гадовая расяянка Галія Шарафетдзінава заваявала золата ў індывідуальным заліку. У 2024 годзе ў індывідуальным рэйтынгу матэматыкаў расеец узяў срэбра. Першае і другое месца занялі Кітай і ЗША адпаведна. Беларусы Міхаіл Райхман і Мацвей Вылегжанін — 11 і 14 месцы.
