Адмыслоўцам і прызнаным навукоўцам можна стаць толькі на радзіме, распавёў аналітык Беларускага інстытуту стратэгічных даследаванняў Аляксей Аўдонін у эфіры «Альфа Радыё» 28 жніўня 2024 года.
«Ніхто не будзе з нашай таленавітай моладзі рабіць Нобелеўскіх лаўрэатаў. Ніхто, ні пры якіх абставінах. Яны ўсё будуць прысвойваць сабе. Таму стаць талентам і стаць прызнаным навукоўцам, спецыялістам можна толькі ў сябе, на сваёй радзіме. Ствараючы даброты для свайго народу і нацыянальнай эканомікі», — заявіў Аўдонін.
Спіс Нобелеўскіх лаўрэатаў розных гадоў не пацвярджае словы аналітыка. У ЗША, паводле дадзеных за 2000 год, якія апублікаваў Нацыянальны фонд амерыканскай палітыкі, 40% з іх — імігранты.
Ёсць такія прыклады і сярод выхадцаў з тэрыторыі Савецкага Саюзу. Адзін з іх — пісьменнік Іосіф Бродскі, які з 70-х гадоў жыў у эміграцыі.
Амерыканскі эканаміст Сайман Кузнец у 1971 годзе атрымаў Нобелеўскую прэмію па эканоміцы. Нарадзіўся ён у беларускім Пінску ў 1901 годзе, вучыўся і працаваў ва ўкраінскім Харкаве, а ў 1922 годзе з'ехаў у ЗША.
Адзін з апошніх прыкладаў — нобелеўскі лаўрэат па фізіцы 2010 года Андрэй Гейм, вядомы як адзін з распрацоўшчыкаў метаду атрымання графену. Ён нарадзіўся ў Сочы, вучыўся ў Маскве, працаваў у Акадэміі Навук СССР. З'ехаў у 1990 годзе, цяпер жыве і працуе ў Вялікай Брытаніі.
Беларускія таленты атрымлівалі Нобелеўскую прэмію двойчы: пісьменніца Святлана Алексіевіч і праваабаронца Алесь Бяляцкі. Алексіевіч з'ехала з Беларусі, а Бяляцкага на радзіме прысудзілі да 10 гадоў пазбаўлення волі за нібыта фінансаванне пратэстаў пасля выбараў прэзідэнта ў 2020 годзе і кантрабанду грашовых сродкаў.
