Тэма, якая абмяркоўваецца больш за ўсё – заробкі. У сярэдзіне ліпеня ў чатах пісалі, што заробкі ў вагнэраўцаў, якія зʼехалі ў Беларусь, значна зменшацца – з 240 тысяч расейскіх рублёў (2600 долараў) да 150 тысяч (1600 долараў). Цяпер жа пішуць, што і гэтыя сумы не канчатковыя. Адна з удзельніц чата згадала суму 60 тысяч. Акрамя таго, некаторым мужы паведамілі, што з іх заробкаў аднімуць харчаванне ў Беларусі.

Абмяркоўваюць і тэрміны атрымання заробкаў, а таксама дзе гэта можна зрабіць. Касы ў многіх расейскіх гарадах закрыліся. Цяпер сваякі могуць атрымаць грошы па даверанасці толькі ў Санкт-Пецярбурзе ці Маскве. Пры гэтым некаторыя ўдзельніцы чатаў сцвярджаюць, што складзеныя раней даверанасці на жонак і маці адклікалі, атрымаць выплаты найміты могуць толькі асабіста.

Няма канкрэтыкі і з адпачынкамі. Нехта ўжо вярнуўся дадому на адпачынак. Іншыя паведамілі, што іх не адпускаюць. Усё гэта абмяркоўваецца ў кантэксце падпісання доўгатэрміновых кантрактаў і адпраўкі ўдзельнікаў ПВК «Вагнэр» у Афрыку.

Інфармацыі ў сваякоў мала, бо не заўсёды ўдаецца звязацца з тымі, хто ў Беларусі. Некаторыя кажуць, што мужчыны не тэлефанавалі з 10 чэрвеня. Адныя тлумачаць гэта тым, што камандзіры тэлефанаваць забараняюць, іншыя – дрэннай сувяззю, трэція – адсутнасцю тэлефонаў у шматлікіх байцоў. Аднак некаторыя, мяркуючы па паведамленнях у чаце, рэгулярна маюць зносіны з мужамі.

Самі вагнэраўцы кажуць, што ў Беларусі ім падабаецца – прыгожая прырода, чыстае паветра і смачная ежа. Але скардзяцца на «конскія цэны» у гандлёвай кропцы на тэрыторыі лагера. Некаторыя з байцоў ПВК просяць жонак перавесці ім грошай «на буфет». Купляюць цыгарэты, энергетычныя напоі.

Часам у чатах зʼяўляюцца навіны. З апошняга – там абмеркавалі дэмантаж герба СССР з манумента «Радзіма-маці» у Кіеве. Адна з удзельніц напісала, што «заняцца ім няма чым».